Dy shqiptarë, të moshave 37 dhe 30 vjeç, janë arrestuar nga policia italiane pas kapjes së një sasie të madhe kokainë. Të dy ata rezultojnë të dënuar më parë për posedim me qëllim shpërndarje droge. Policia milaneze identifikoi 37-vjeçarin pasi përdorte furgonë të ndryshëm me qira, dyshuar se i përdorte për të transportuar kokainë në disa zona të Italisë Veriore.

Falë ndihmës së oficerëve të policisë rrugore, 37-vjeçari u ndalua pranë kabinës së pagesës A7 në Assago (MI), ku u gjet dhe u sekuestrua një pako kokainë me peshë rreth 1 kg, fshehur në një kompresor të madh ajri. Hetuesit zbuluan gjithashtu një grup çelësash që i përkisnin një apartamenti në Sorisole (BG), ku u gjetën 40 pako kokainë të vendosura në tavolinën e kuzhinës dhe 25 pako të tjera të fshehura në strukturën e divanit të dhomës së ndenjes. Po ashtu, u sekuestruan 6.570 euro, material paketimi droge, një pajisje për vakum, peshore precize, një fletore me llogaritë e aktivitetit të paligjshëm dhe një makinë numërimi parash.

Në oborrin e godinës, policia arrestoi edhe 30-vjeçarin, i cili nuk mundi të justifikonte praninë e tij në vendngjarje. Atij iu gjetën çelësa që lejonin hyrjen në apartamentin që ishte i disponueshëm për përdorim të plotë. Droga e sekuestruar në total arrin në rreth 76 kg, e ndarë në pako me logo të ndryshme. 37-vjeçari është dërguar në paraburgim në Milano, ndërsa 30-vjeçari në Bergamo.