Policia e Tiranës ka goditur dy raste të shpërndarjes së lëndës narkotike kokainë në Kamëz, duke vënë në pranga dy shtetas.

Të arrestuarit janë Florin Pepkolaj, 35 vjeç, dhe Edison Stambolli, 36 vjeç, banues në Kamëz. Arrestimet u kryen gjatë kontrolleve në zonën e Valiasit dhe në rrugën “Ismail Qemali”, ku policia ndaloi të dyshuarit dhe kontrolloi fizikisht si edhe automjetet e tyre.

Nga kontrollet, efektivët gjetën doza kokaine të ndara dhe të gatshme për shitje, të cilat u sekuestruan në cilësinë e provës materiale.

Në njoftimin zyrtar, Policia bën të ditur:

“Si rezultat i kontrolleve sistematike, me objektiv goditjen e paligjshmërive, në çdo formë të shfaqjes së tyre, shërbimet e Komisariatit të Policisë Nr. 5, në bashkëpunim me Seksionin për Hetimin e Narkotikëve, konstatuan dhe goditën dy raste të sigurimit dhe ndarjes së lëndës narkotike kokainë, në doza, me qëllim shitjen. Për këto raste, u arrestuan në flagrancë shtetasit F. P., 35 vjeç, dhe E. S., 36 vjeç, të dy banues në Kamëz.”

Materialet procedurale iu referuan Prokurorisë së Tiranës për veprime të mëtejshme.