Dy të pandehurit e akuzuar për nxitjen e vrasjes së dyfishtë në Finikounda, Greqi, kanë kërkuar dhe kanë marrë një afat deri të hënën në orën 10:00 për t’u paraqitur para gjyqtarit hetues dhe për të dhënë deklarimin e tyre.

Të arrestuarit janë nipi i pronarit të kampingut, Kosta Tomaras, dhe miku i tij biznesmen, i cili ishte edhe punëdhënës i një prej të rinjve të përfshirë në ngjarje. Në pranga qëndron edhe një tjetër 22-vjeçar, ndërsa një person i pestë mbetet i kërkuar nga policia. Motivi i krimit dyshohet të jetë konflikti për trashëgiminë e pasurisë mes nipit dhe xhaxhait të tij, ndërsa dëshmia e mbesës së viktimës ndihmoi hetuesit në identifikimin e autorëve.

Sipas informacioneve, xhaxhai i saj kishte ndryshuar testamentin pesë herë brenda gjashtë muajve, duke përfshirë një ndryshim pak ditë para vrasjes, duke lënë një pjesë të pasurisë punëtorit shqiptar 62-vjeçar.

Qëndrimi i dy të pandehurve në Gjykatën e Kalamatës zgjati rreth një orë. Avokati i nipit 33-vjeçar, Yiannis Verras, deklaroi se klienti i tij po e shpall veten të pafajshëm dhe se ndodhet në një gjendje të rënduar psikologjike. Ai shtoi se pret të marrë kopje të dosjes për të dhënë një deklaratë më të detajuar dhe për të shqyrtuar bazën e akuzave.

Ngjarja ishte tentuar të kamuflohej si konflikt mes një prej 22-vjeçarëve dhe pronarit grek, ndërsa hetimet kanë nxjerrë në pah elemente kontradiktore në dëshminë e nipit, i cili pas ngjarjes kontaktoi mikun e tij biznesmen për të koordinuar veprimet.

Hetuesit tani fokusohen tek të dhënat e mbledhura, mikrogjurmët dhe dëshmitë për të ndërtuar çështjen kundër dy të pandehurve kryesorë.