Detaje të reja kanë dalë nga operacioni policor i koduar “Mataro”, ku deri më tani janë arrestuar çifti i bashkëshortëve Nikoll e Marie Marku, si dhe dhëndri i tyre Mark Lamkja.

Këtë të hënë, policia ka mësyrë në apartamentin në pronësi të Edmir Vlashit, që ndodhej në Rrugën Besëlidhja në Lezhë. Atje është gjetur një pistoletë si dhe disa mjete identifikimi.

Vlashi dhe Hektor Ndoka, të dy të shpallur në kërkim, dyshohet se do të vrisnin Preng Palucën në Kamëz, e aktualisht, mendohet se ato janë larguar nga vendi. Sakaq, mësohet se policia ka dërguar në laborator pistoletën, pasi dyshohet se është përdorur në një ngjarje kriminale.

Vrasja që po planifikonin të kryenin:

Një atentat mafioz i planifikuar për t’u kryer në Tiranë, në shënjestër të të cilit ishte Preng Paluca, u parandalua nga policia e Lezhës më 8 dhjetor.
Edmir Vlashi dhe Hektor Ndoka, baxhanakë me njëri-tjetrin, personat që do të kryenin vrasjen, janë shpallur në kërkim, ndërsa në pranga përfunduan 3 persona të tjerë bashkëpunëtorë me ta, pronarë të një lokali që përdorej si bazë armatimi dhe dhëndri i tyre. Nga hetimet policia zbuloi se në 2017 Edmir Vlashi i grabiti një sasi të madhe droge vëllait të Preng Palucës. Prej asaj kohe, mes tyre lindi një konflikt i ashpër.
Në pamundësi për të rënë në gjurmët e vëllait të Preng Palucës, 31-vjeçarët Hektor Ndoka dhe Edmir Vlashi, të dënuar më herët në Belgjikë për grabitje me armë e drogë, besohet sipas policisë se po e ndiqnin këmba këmbës objektivin e tyre, Paluca dhe po prisnin momentin për ta ekzekutuar. Mesa duket ky i fundit e kuptoi që ishte vënë në shënjestër dhe informoi policinë. Nga hetimet u zbulua se për të realizuar planin, Ndoka dhe Vlashi përdorën si bazë për armët restorantin e Nikoll e Marie Markut në Lezhë, dhe dhëndrin e tyre Mark Lamkja si bashkëpunëtor për realizimin e planit. Çifti Marku dhe dhëndri i tyre, i cili u arrestua me pistolete ne brez, gjatë ndërhyrjes së policisë tentuan të fshihnin provat.