Policia e Sarandës ka arrestuar në flagrancë dy vëllezër, Romeo dhe Fabion Laze, të cilët akuzohen për plagosje të rëndë me dashje në bashkëpunim.

Ngjarja ndodhi pasditen e së dielës në lagjen nr. 4 të Sarandës, rreth orës 17:45, pas një konflikti për parkimin. Vëllezërit, pronarë të një lavazhi, kanë goditur nënë e bir, N.A. dhe E.A., me grushte, shkopinj dhe sende të forta, duke u shkaktuar plagë të shumta në kokë dhe trup. Fatmirësisht, gjendja e tyre shëndetësore nuk është në rrezik për jetën.

Në konflikt u përfshinë të paktën 6 persona, por pas hetimeve policia ka arrestuar Romeo Laze, 45 vjeç, dhe Fabion Laze, 39 vjeç.

Sipas të dhënave, vëllezërit Laze kanë një histori të gjatë të precedentëve penalë:
• Maj 2011: Plagosje me sende të forta ndaj dy vëllezërve Avdiu.
• Tetor 2014: Fabion arrestuar për “prodhim dhe shitje të lëndëve narkotike”.
• Dhjetor 2015: Romeo arrestuar për “dhunë në familje” dhe dëmtime të tjera me dashje.
• Gusht 2021: Romeo arrestuar sërish për “prodhim dhe shitje të lëndëve narkotike”.
• Shkurt 2025: Prokuroria sekuestroi dy pasuri, dy automjete dhe një biznes të Romeo Lazes.
• Fabion ka precedentë penalë për narkotikë edhe jashtë shtetit.

Ngjarja vijon të hetohet nga autoritetet lokale për sqarimin e plotë të rrethanave dhe për të zbardhur rolin e të tjerëve të përfshirë.