Një situatë shqetësuese është raportuar gjatë gjithë kësaj jave në qytetin e Gramshit, ku dhjetëra fëmijë që frekuentojnë një kopsht shtetëror kanë shfaqur shenja të rënda helmimi, të dyshuara se janë shkaktuar nga ushqimi i ofruar në institucion.

Shërbimi i ushqimit në këtë kopsht ofrohet nga një kompani private kateringu, e kontraktuar për të përgatitur dhe shpërndarë ushqimin për fëmijët. Gjatë ditëve të fundit, një numër i madh fëmijësh janë paraqitur në spitalin e qytetit të Gramshit me simptoma si:
• Temperaturë e lartë
• Të vjella
• Përzierje
• Dhimbje të forta koke dhe barku

Fillimisht, prindërit dyshuan për një valë gripi, por rezultatet e analizave mjekësore treguan se bëhej fjalë për helmim ushqimor të shkaktuar nga bakteri Salmonela. Kjo ka ngritur shqetësime të mëdha në komunitet, ndërsa autoritetet shëndetësore akuzohen se kanë mbajtur të fshehtë situatën për disa ditë, duke mos informuar publikun apo marrjen e masave parandaluese në kohë.

Ndërkohë, Njësia Vendore e Kujdesit Shëndetësor në Gramsh ka konfirmuar se janë marrë në total 76 mostra nga fëmijët dhe stafi i institucionit, të cilat janë në proces analizimi për të përcaktuar shkakun e saktë të helmimit dhe përgjegjësitë.

Ngjarja ka shkaktuar alarm dhe indinjatë tek prindërit, të cilët kërkojnë transparencë të plotë, përgjegjësi nga institucionet dhe ndëshkim për kompaninë që ofron ushqimin nëse provohet fajësia. Hetimet epidemiologjike pritet të zbardhin në ditët në vijim mënyrën se si ka ndodhur kontaminimi dhe nëse janë respektuar standardet e sigurisë ushqimore.