Një 19-vjeçare gjermane, e dënuar me 10 vite burg për veprimtari kriminale në fushën e narkotikëve, është arrestuar në Tiranë me qëllim ekstradimin drejt Gjermanisë.

Policia e Shtetit bëri të ditur se e reja, e identifikuar si Maryam Assaf, ishte shpallur në kërkim ndërkombëtar dhe ishte fshehur në Shqipëri. Ajo u kap në kuadër të fazës së 85-të të operacionit të koduar “Operacionalja”, të zhvilluar nga Policia e Shtetit.

Sipas njoftimit zyrtar, arrestimi u realizua nga Drejtoria e Forcës së Posaçme Operacionale në Departamentin e Policisë Kriminale, pas shkëmbimit të informacioneve me homologët gjermanë.

Autoritetet bëjnë me dije se në qershor 2025, Gjykata e Hanoverit e kishte dënuar 19-vjeçaren me 10 vite burgim për krime në fushën e narkotikëve.

Arrestimi i saj në Tiranë u krye në mënyrë provizore, me qëllim nisjen e procedurave për ekstradimin drejt Gjermanisë, ku do të vuajë dënimin e dhënë nga drejtësia gjermane.