Kandidati i Partisë Socialiste për kryetar bashkie në Mat, Altin Bojni, u shpreh i emocionuar pas fitores së arritur të dielën.

Bojni garantoi angazhim maksimal për të vijuar projektet madhore për zhvillimin e bashkisë dhe për një të ardhme sa më të mirë për qytetarët.

“Një emocion i veçantë, por sot dua të falënderoj të gjithë banorët e bashkisë Mat për besimin dhe mbështetjen e tyre. E gjithë kjo mbështetje është një përgjegjësi e madhe që duhet ta përkthejmë në shumë punë për komunitetin tonë, që punët e mira të mos ndalen dhe e ardhmja të jetë më e mirë. Me këtë ritëm do të vazhdojmë përpara që bashkia jonë të jetë sa më mirë”, tha Bojni.

Në zgjedhjet e djeshme, Bojni mori 7,425 vota (66,54%), duke lënë pas kandidatin e pavarur të mbështetur nga PD, Eduart Brahilika, me 3,184 vota (28,54%), si dhe kandidaten e pavarur Suzana Pasha, e cila mori 549 vota (4,92%).

Fitorja e tij konsolidon pozicionin e Partisë Socialiste në Mat dhe i jep mundësinë për të realizuar projektet e planifikuara për qytetin.