Kryeministri Edi Rama ka marrë pjesë ditën e sotme në homazhet që po mbahen në nderim të gjyqtarit të ndjerë të Apelit, Astrit Kalaja. Krahas tij, në ceremoni ishte i pranishëm edhe ministri i Drejtësisë, Besfort Lamallari, si dhe përfaqësues të lartë të sistemit gjyqësor e të drejtësisë shqiptare.

Homazhet u zhvilluan në një atmosferë të rënduar, ndërsa kolegë dhe bashkëpunëtorë të gjyqtarit shprehën dhimbjen e thellë për humbjen tragjike të tij.

Ngjarja ndodhi pas përfundimit të një seance gjyqësore për një çështje pronësie në Shkodër, që po shqyrtohej në Apelin e Tiranës. Sipas hetimeve paraprake, gjyqtari Astrit Kalaja kishte dhënë vendimin kundër palës së përfaqësuar nga Elvis dhe Gjon Shkambi.

Menjëherë pas shpalljes së vendimit, Elvis Shkambi ka nxjerrë armën dhe ka qëlluar tre herë në drejtim të gjyqtarit, duke e goditur për vdekje. Gjatë të njëjtës ngjarje u plagosën edhe babë e bir, Rakip dhe Ervis Kurtaj, të cilët ishin pala tjetër në proces. Ata ndodhen aktualisht në Spitalin e Traumës, jashtë rrezikut për jetën.