Kryeministri Edi Rama zhvilloi sot një takim me të rinjtë në Tiranë, ku theksoi rëndësinë e zgjedhjeve të 11 majit për të ardhmen europiane të Shqipërisë. Në fjalën e tij, Rama nënvizoi se këto zgjedhje nuk janë thjesht një votë për një parti politike, por një moment vendimtar për rrugëtimin europian të vendit.

“Zgjedhjet e 11 majit nuk janë thjesht zgjedhje për një parti. Nga ajo që do të ndodhë më 11 maj varet shumë ajo se çfarë do të ndodhë me Shqipërinë dhe marrëdhëniet e Shqipërisë me BE”, deklaroi kryeministri.

Ai shtoi se Shqipëria ka sot një mundësi të artë për t’u bërë pjesë e familjes së madhe europiane, duke theksuar ndryshimin e madh që ka ndodhur ndër vite në rrugën drejt Bashkimit Europian.

“Janë 27 vende që vendosin së bashku për të hapur derën. Ne, kur kemi ardhur në detyrë në mandatin e parë, kemi qenë shumë larg asaj dere. Tani situata ka ndryshuar”, u shpreh Rama.

Gjatë bashkëbisedimit me të rinjtë, Rama foli edhe për rëndësinë e pasaportës europiane për shqiptarët, duke shpjeguar se me anëtarësimin në BE, çdo qytetar shqiptar do të ketë të njëjtat të drejta si një qytetar i vendeve anëtare.

“Pasaporta që kemi sot është një dokument udhëtimi që na ndan nga qytetarët e BE. Kur ta marrim pasaportën europiane, do të kemi statusin e barabartë me qytetarët e BE”, tha ai.

Kryeministri shpjegoi gjithashtu procesin e negociatave, duke theksuar se ato përfshijnë punën e qindra ekspertëve nga të dyja palët dhe kërkojnë miratimin dhe zbatimin e një sërë ligjesh, vendimeve dhe standardesh.

“Ne i kemi nisur negociatat vitin e kaluar dhe na kanë thënë që t’i mbyllim për tre vite. Pse për tre vite? Sepse BE ka hapur derën dhe dëshiron që Shqipëria dhe Mali i Zi të bëhen anëtarë,” shtoi ai.

Në fund të takimit, Rama i bëri thirrje të rinjve dhe qytetarëve që të votojnë më 11 maj për një Shqipëri europiane dhe për një të ardhme të barabartë me atë të qytetarëve të Bashkimit Europian.