Kryeministri Edi Rama ka komentuar në nisje të podcastit “Flasim” çështjen e pezullimit nga detyra të zv/kryeministres Belinda Balluku, duke paralajmëruar një nismë ligjore pas asaj që e cilësoi si “mosmarrje e një vendimi nga Gjykata Kushtetuese”.

Sipas Ramës, çështja nuk lidhet me individin, por me parimin e ndarjes së pushteteve. “Nuk është çështja tek personi, çështja është tek parimi… tek parimi i ndarjes së panegociueshme të pushteteve kushtetuese”, u shpreh ai, duke shtuar se një vendim gjyqësor për pezullimin e një ministri në kuadër të një mase sigurie penale ka nxjerrë në pah një boshllëk ligjor dhe institucional.

Kryeministri theksoi se gjykatat kanë të drejtë të vendosin masa sigurimi për çdo person nën hetim, por argumentoi se funksioni i ministrit është i padelegueshëm. “Nëse ti thua ‘unë pezulloj një ministër’, faktikisht ti prodhon një pasojë të menjëhershme të barabartë me shkarkimin, sepse nuk është pezulluar thjesht personi, por është pezulluar funksioni”, deklaroi Rama.

Ai shtoi se emërimi dhe shkarkimi i ministrave janë kompetenca të ekzekutivit dhe nuk mund të transferohen te pushteti gjyqësor. “Pavarësia e pushtetit gjyqësor mbaron aty ku fillon pavarësia e dy pushteteve të tjera”, u shpreh kryeministri.

Rama njoftoi se të hënën, në cilësinë e deputetit, së bashku me kreun e grupit parlamentar Taulant Balla dhe kryetarin e Komisionit të Ligjeve Ulsi Manja, do të depozitojë një nismë ligjore për të adresuar boshllëkun e konstatuar.

Sipas tij, nisma do t’i paraqitet fillimisht grupit parlamentar dhe procesi do të jetë transparent, me prezantimin që do të bëhet në prani të mediave.