Edon Zhegrova, mesfushori shqiptar nga Kosova, është përforcimi i ri i Juventusit. Futbollisti kalon në Torino, duke firmosur një kontratë që e lidh me klubin bardhezi deri në vitin 2030.

Sipas marrëveshjes, shuma bazë e transferimit është 14.3 milionë euro, e pagueshme në katër vite. Përveç kësaj, kontrata parashikon bonuse të mundshme deri në 1.2 milionë euro dhe shpërblime shtesë për objektiva sportive që mund të arrijnë deri në 3 milionë euro.

Në fanellën bardhezi, Zhegrova do të mbajë numrin 11, duke u bërë pjesë e projektit të ri të “Zonjës së Vjetër”.

Ky transferim është një hap i rëndësishëm në karrierën e futbollistit kosovar dhe një përforcim strategjik për Juventusin në sezonin e ardhshëm.