Egjipti ka konfirmuar pranimin e një liste me 13 izraelitë dhe një liste me 39 palestinezë që pritet të lirohen të dielën, si pjesë e procesit të këmbimit të pengjeve ndërmjet Hamasit dhe Izraelit në ditën e tretë të armëpushimit. Armëpushimi, i ndërmjetësuar nga Egjipti, Katari dhe Shtetet e Bashkuara, nisi të premten dhe ka shënuar një periudhë pa konflikte. Kjo do të jetë hera e tretë që dyja palët kryejnë këmbimin e pengjeve, duke shpallur një hap pozitiv në zbatimin e marrëveshjes së armëpushimit.

Të shtunën vonë, Hamasi i liroi 17 pengje, përfshirë 13 izraelitë nga Rripi i Gazës, derisa Izraeli i liroi 39 të burgosur palestinezë.

Këmbimi i pengjeve me të burgosurit u krye në orët e vona, pas vonesave disa orëshe, për shkak se Hamasi e akuzoi Izraelin e se kishte shkelur marrëveshjen e armëpushimit.

Kjo vonesë e theksoi brishtësinë e armëpushimit, i cili e ka ndalur një luftë që e ka tronditur dhe dridhur Izraelin, ka shkaktuar shkatërrim tejet të madh në Rripin e Gazës, si dhe ka kërcënuar me përshkallëzimin e luftës në tërë rajonin.

Lufta shpërtheu më 7 tetor, kur luftëtarët e Hamasit në Gazë i thyen barrierat kufitare dhe u futën në jug të Izraelit, duke i vrarë së paku 1.200 njerëz, kryesisht civilë, dhe duke i rrëmbyer 240 të tjerë, përfshirë gra, fëmijë dhe të moshuar.

Izraeli shpalli gjendje lufte menjëherë, duke kryer bombardime disa javore dhe duke e nisur një ofensivë tokësore, si pasojë e të cilave u vranë mbi 13.300 palestinezë, sipas Ministrisë së Shëndetësisë në territorin e kontrolluar nga Hamasi. Rreth dy të tretat e të vrarëve në Gazë ishin gra dhe të mitur./