Ekipi i asgjësimit të mjeteve shpërthyese të KFOR-it ka ekzaminuar dhe asgjësuar disa armatime të zbuluara nga Policia e Kosovës në një depo në komunën e Leposaviçit, pranë Manastirit të Banjskës. Këto mjete shpërthyese u dërguan më pas në laboratorët e mjekësisë ligjore për analiza shtesë.

Njoftimi i KFOR-it thekson se ekipi ka punuar në bashkëpunim të ngushtë me Policinë e Kosovës në këtë operacion. Batalioni i Manovrimit i KFOR-it po vazhdon sigurimin e zonës për të verifikuar nëse ka depo të tjera të mundshme pranë këtij objekti.

Sipas raportit të policisë, dyshohet se këto mjete mund të lidhen me ngjarjet e shtatorit të vitit të kaluar, ku grupi terrorist i drejtuar nga Milan Radoiçiç sulmoi një patrullë të Policisë së Kosovës, duke shkaktuar vdekjen e policit Afrim Bunjaku.