Konsumimi i ulët i frutave dhe perimeve po sjell mungesa serioze të fibrave, kalciumit, vitaminës D dhe kaliumit – kërcënim për shëndetin publik
Ekspertët e shëndetit publik kanë ngritur shqetësime serioze lidhur me rënien e konsumit të vlerave ushqyese jetësore në dietën e përditshme të njerëzve. Në një raport të fundit të publikuar nga HuffPost, thuhet se ushqimet që konsumohen sot përmbajnë gjithnjë e më pak vlera të vërteta ushqyese, çka po ndikon drejtpërdrejt në shëndetin e popullsisë.
Sipas të dhënave zyrtare nga Departamenti Amerikan i Bujqësisë dhe Departamenti i Shëndetit dhe Shërbimeve Njerëzore, më pak se 10% e njerëzve arrijnë të konsumojnë sasinë e rekomanduar të përditshme të perimeve (nga 2 deri në 3 gota në ditë), ndërsa vetëm 20% konsumojnë mjaftueshëm fruta (nga 1.5 deri në 2 gota në ditë).
Por situata bëhet edhe më alarmante kur flitet për ato që quhen “vlera ushqyese që mungojnë” – substanca të domosdoshme për organizmin, por që konsumohen në sasi shumë të vogla.
Lista e këtyre përfshin:
• Vitaminat A, D, E dhe C
• Folatin
• Kalciumin
• Magnezin
• Fibrat
• Kaliumin
• Hekurin (veçanërisht për adoleshentet dhe gratë para menopauzës)
Nga të gjitha këto, katër prej tyre janë klasifikuar si “vlera ushqyese kritike” për shkak të ndikimit negativ që mungesa e tyre ka për shëndetin publik:
1. Fibrat – Të nevojshme për sistemin tretës dhe parandalimin e diabetit dhe sëmundjeve të zemrës.
2. Kalciumi – I domosdoshëm për kockat dhe dhëmbët.
3. Vitamina D – E rëndësishme për imunitetin dhe përthithjen e kalciumit.
4. Kaliumi – Ndihmon në ruajtjen e presionit të gjakut dhe funksionin e muskujve dhe zemrës.
Ekspertët paralajmërojnë se rënia e konsumit të këtyre vlerave ushqyese mund të ketë pasoja serioze afatgjata, përfshirë rritjen e rrezikut për sëmundje kronike, dobësim të imunitetit dhe probleme të sistemit kardiovaskular.
Rekomandimi kryesor i mjekëve dhe dietologëve është një kthim tek ushqimi natyral – fruta, perime të freskëta, drithëra të plota dhe më pak ushqime të përpunuara industrialisht.
