Ekzekutimi i biznesmenit Mondi Mëllaha, 43 vjeç, mbrëmjen e së dielës (30 Nëntor) në lagjen “Emin Matraxhiu” të Elbasanit, dyshohet të ketë lidhje me mosmarrëveshje për ndarjen e normës së fitimit mes tij dhe ortakut të tij, Xhino Ago, 32 vjeç.
Policia e Elbasanit bën me dije se Xhino Ago është arrestuar dhe akuzohet për “Vrasje me paramendim”, kryer në bashkëpunim, si dhe “Prodhim dhe mbajtje pa leje të armëve”.
Ndërkohë, si autorë të dyshuar të vrasjes janë shpallur në kërkim Marselo Arani, 32 vjeç, dhe Armando Kola, 35 vjeç, të cilët dyshohet të kenë marrë pjesë në krim.
Gjithashtu, për “Moskallëzim krimi” është arrestuar edhe Kujtim Pisha, 52 vjeç, roja i karburantit në pronësi të viktimës, i cili nuk ka dhënë informacion për ngjarjen.
Gjatë veprimeve hetimore u sekuestruan:
• Automjeti i djegur që u përdor nga autorët, në pronësi të Xhino Agos, i cili ia kishte dhënë me hua Marselo Aranit;
• Arma e zjarrit me të cilën u vra Mëllaha;
• Dokumenta shitblerjeje të automjetit, 3 celularë dhe 2 DVR.
Operacioni policor u kodua “Strike”, ndërsa brenda 24 orëve u identifikuan dhe u shpallën në kërkim dy autorët e dyshuar. Hetimet vijojnë për kapjen e të gjithë personave të përfshirë dhe sqarimin e plotë të rrethanave të ngjarjes.
