Zjarri në landfillin e Elbasanit vazhdon të jetë aktiv prej më shumë se 15 orësh, duke shkaktuar tym të dendur dhe toksik që ka mbuluar jo vetëm zonën përreth, por edhe qytetin e Elbasanit dhe tashmë ka arritur deri në Cërrik.

Përpjekjet për shuarjen e flakëve po vijojnë me intensitet nga dhjetëra zjarrfikës, të cilët po përballen me vështirësi të mëdha për shkak të erës së fortë, e cila jo vetëm që e përhap zjarrin, por e bën edhe më të rrezikshëm ndërhyrjen.

Gjatë natës, qytetarët raportuan ajër të rëndë dhe të padurueshëm, ndërsa autoritetet nuk kanë lëshuar ende një njoftim zyrtar për rrezikun shëndetësor të ndotjes së ajrit.

Tymi ka ndjekur drejtimin e erës, fillimisht drejt lindjes, duke përfshirë Elbasanin, ndërsa tani që drejtimi i erës ka ndryshuar, reja toksike është përhapur në drejtim të Cërrikut.

Banorët e zonës shprehen të shqetësuar për ndikimin që kjo situatë mund të ketë në shëndetin publik, veçanërisht te fëmijët, të moshuarit dhe personat me probleme respiratore.

Autoritetet lokale dhe emergjencat civile pritet të japin informacione shtesë në orët në vijim.