Kryeparlamentarja Elisa Spiropali ka reaguar ashpër pas situatës së tensionuar në Kuvend, ku deputetët e opozitës dogjën karriget si akt proteste simbolike. Spiropali e dënoi zjarrvënien, duke e cilësuar atë si “nivelin më ekstrem të mungesës së respektit për qytetarët, ligjin dhe institucionet e shtetit demokratik.”

Në një postim publik, ajo theksoi se ky veprim ka kthyer Kuvendin në një “skenë krimi,” që sipas saj duhet të merret nën hetim nga organet ligjzbatuese.

“Karriget tona janë të qytetarëve,” u shpreh një deputet i opozitës, dhe kjo është shumë e vërtetë. Prandaj ato karrige janë për t’u respektuar duke u ulur mbi to me peshën e besimit të marrë prej qytetarëve,” theksoi Spiropali. Ajo nënvizoi se djegia e tyre është një shenjë e përbuzjes më të thellë për demokracinë.

Spiropali shtoi se aktet ekstreme të dhunës që ndodhën brenda sallës së Kuvendit përfaqësojnë një “fatkeqësi për shtetin demokratik” dhe se “zjarrvënia është veprim i papranueshëm dhe duhet trajtuar si një krim.”

Në përfundim, ajo shprehu keqardhje të thellë për degradimin e situatës dhe dënoi dhunën e shfaqur në institucionet demokratike të Shqipërisë.