Goga Levian, emigranti shqiptar i njohur si “Leo i fshatit” në Neohori të Artës, ndodhet në spital pas shfaqjes së problemeve të frymëmarrjes dhe gëlltitjeve të forta, pas aktit të tij heroik për shpëtimin e dy fëmijëve që po mbyteshin në lumin Arakhtos.

Sipas mjekëve, gjendja e tij është stabile dhe nuk ka shqetësime serioze. Ministri i Shëndetësisë, Adonis Georgiadis, urdhëroi menjëherë dërgimin e tij me ambulancë për ekzaminime të detajuara në spitalin e Artës.

Goga Levian, 41 vjeç, emigrant nga Berati, jeton prej 24 vjetësh në Greqi me familjen e tij dhe njihet për guximin e jashtëzakonshëm me të cilin u hodh në ujërat e rrëmbyeshëm për të shpëtuar dy fëmijë të mitur. Ai arriti të nxirrte nga uji një prej tyre, ndërsa tjetri u shpëtua pak më vonë nga banorët e tjerë.

Në një intervistë për mediat greke, Levian theksoi se veprimi i tij ishte thjesht një detyrim njerëzor: “Fëmijët. Vetëm ata mendoj,” tha ai. Përveç trajtimit mjekësor, Goga do të nderohet me shtetësinë greke nderi për aktin e tij heroik.

“Ai fëmijë ishte në moshën e vajzës sime. Nuk kishte rëndësi kush ishin, çfarë etnie apo feje. Unë jam një i huaj, por jam njeri. I bëra atë që do të bëja çdo baba,” tregon ai për mediat me një zë të dridhur.

Goga Levian është një njeri i thjeshtë që nuk kërkon asnjë shpërblim për veprën e tij heroike. “Uroj që ata të jetojnë, të zgjohet dhe të jetojnë jetën e tyre,” thotë ai.