Presidenti turk, Rexhep Taip Erdogan, po zhvillon një vizitë dyditore në Serbi, ku u takua me homologun e tij, Aleksandër Vuçiç. Gjatë një konference të përbashkët për shtyp, Erdogan u shfaq si ndërmjetës mes Beogradit dhe Prishtinës, duke u përqendruar tek tensionet mes Serbisë dhe Kosovës. Ai u bëri thirrje të dyja palëve të veprojnë me qetësi dhe të përdorin “një mendje të shëndoshë” për të gjetur zgjidhje.

“Kemi theksuar edhe një herë rëndësinë e paqes dhe stabilitetit në Ballkan. Është shumë e rëndësishme të veprojmë me qasje të logjikshme kur bëhet fjalë për tensionet mes Kosovës dhe Serbisë,” tha Erdogan, duke i inkurajuar liderët të zgjedhin dialogun.

Presidenti serb, Aleksandër Vuçiç, falënderoi homologun e tij turk për mbështetjen e vazhdueshme dhe theksoi rëndësinë e stabilitetit për zhvillimin ekonomik të rajonit. “Turqia është një nga lojtarët më të rëndësishëm në Ballkan dhe ne presim mbështetje prej saj në proceset e paqes dhe dialogut,” shtoi Vuçiç, duke vlerësuar përpjekjet e Erdoganit për të dëgjuar të gjitha palët e përfshira në konfliktet e Ballkanit.