Kryetarja e Parlamentit Lindita Nikolla i ka uruar mirëseardhjen Presidentit të Turqisë Rexhep Taip Erdogan, i cili mbajti një fjalim në seancën e sotme plenare që është seanca e parë e sesionit të ri 2022.
Nikolla e cilësoi Erdogan një mik në ditë të mira, por edhe një mik i vyer në ditë të vështira. Sipas Nikollës, Shqipëria dhe Turqia janë partnerë të besueshëm në NATO dhe në përpjekjet e përbashkëta për zhvillimin, sigurinë, fqinjësinë e mirë, paqen, stabilitetin në rajon, kontinent e më gjerë.
“Kam kënaqësinë t’i uroj mirëseardhjen në Kuvendin e Shqipërisë Shkëlqesisë së Tij, Zotit Rexhep Taip Erdogan, President i Republikës së Turqisë.
Presidenti Erdogan është një mik i nderuar i Shqipërisë dhe i shqiptarëve.
Një mik në ditë të mira, por edhe një mik i vyer në ditë të vështira.
Presidenti Erdogan, para se të vinte në këtë sallë, ishte sot mes banorëve të Kurbinit, në qytetin e Laçit, për të inauguruar dhe dorëzuar familjeve të dëmtuara nga tërmeti 522 apartamentet e ndërtuara me financime të Qeverisë së Turqisë, një bllok i ri banimi, një xhevahir urban, i ndërtuar me financime të Qeverisë së Turqisë.
Ky kontribut i çmuar nuk është i vetmi. Spitali rajonal i Fierit, i ndërtuar në një kohë rekord, dhe që ka nisur prej muajsh t’u shërbejë qytetarëve të Fierit e më gjerë, është një tjetër dhuratë e Turqisë mike dhe e Presidentit mik Erdogan.
Solidarizimi e mbështetja në ditët e vështira të tërmetit dhe të pandemisë reflektojnë më së miri marrëdhëniet miqësore që ekzistojnë midis popujve tanë.
Por marrëdhëniet tona nuk janë thjesht vëllazërore, solidare e njerëzore. Të dy vendet tona nuk i lidh vetëm humanizmi dhe përballimi bashkarisht i vështirësive.
Shqipëria dhe Turqia janë partnerë të besueshëm në NATO dhe në përpjekjet e përbashkëta për zhvillimin, sigurinë, fqinjësinë e mirë, paqen, stabilitetin në rajon, kontinent e më gjerë.
‘Deklarata e Përbashkët Politike’ i ngriti marrëdhëniet dypalëshe në nivelin e partneritetit strategjik dhe hapi një kapitull të ri në marrëdhëniet midis vendeve tona.
Në këto zhvillime është, padyshim, kontributi politik dhe personal i Presidentit Erdogan, për të cilën gjej rastin të shpreh mirënjohjen e thellë të Kuvendit të Shqipërisë.
