Deputeti i PS, Erion Braçe, kritikoi Raportin vjetor të Autoritetit të Mbikëqyrjes Financiare (AMF) për vitin 2023 në Kuvendin e Shqipërisë. Ai shprehu shqetësimin se raporti i këtij viti është praktikisht një kopje e raportit të vitit të kaluar dhe vuri në dukje se nuk ka asnjë kompani të re që ka hyrë në tregun e sigurimeve.

“Raporti edhe këtë vit është i njëjti copy-paste. Në tregun e sigurimeve, që është më masivi në aspektin e produkteve, nuk ka asgjë të re, nuk lëviz asgjë, janë të njëjtat kompani që nuk ndryshojnë. Nuk ka hyrë asnjë kompani e re në treg. Po të lexonit raportin e Autoritetit të Konkurrencës, shihet se në këtë treg ka një marrëveshje, që për habi e miraton edhe Autoriteti i Konkurrencës, që duhet të garantojë konkurrencën dhe miraton një marrëveshje midis të gjitha kompanive që operojnë në tregun e sigurimeve. Është një çmim që e zbatojnë të gjithë dhe pastaj ndajnë të ardhurat, sepse kanë ndarë tregun me për qindje”, tha Braçe.