Kreu i Bashkisë së Tiranës, Erion Veliaj, ka shprehur gëzimin dhe krenarinë për faktin që Tirana ka marrë drejtimin e Presidencës së B-40, rrjetit më të madh të bashkive në rajonin e Ballkanit.
Në samitin e zhvilluar në kryeqytet, Veliaj ka theksuar se kjo është koha për bashkëpunim si kurrë më parë dhe ka shprehur gatishmërinë e Tiranës për të ndihmuar dhe bashkëpunuar me qytetet e tjera. Ai ka theksuar rolin e qyteteve në zhvillimin e qëndrueshëm dhe ka propozuar krijimin e një fondi solidariteti për të ndihmuar bashkitë e rajonit në raste fatkeqësish.
Po ashtu, Veliaj ka theksuar rëndësinë e transformimit digjital të qyteteve dhe ka ftuar për një bashkëpunim të thellë në fusha të ndryshme, duke përfshirë ekonominë lokale dhe bashkëpunimin kulturor.
“Në Presidencën e Tiranës, ne duam të propozojmë një fond solidariteti për të gjitha bashkitë e rajonit tonë. Bashkia e Tiranës e ka bërë rregullisht këtë me qytetet e rajonit tonë. Kishim përmbytjet në Tetovë, po ashtu në Kosovë, tërmetin në Zagreb, zjarret në Athinë. Do të donim të mos ishim vetëm, dhe të mos bëja me një bashki, ose secila bashki veç e veç. Ndaj, ne duam të propozojmë një fond solidariteti për t’ju gjendur në mënyrë emergjente një prej anëtarëve tanë, i cili ka një nevojë të një fatkeqësie natyrore për fonde që mund t’i mobilizojmë menjëherë dhe mund të jetë efektive në një kohë sa më të shpejtë që të jetë e mundur”, tha Veliaj.
