Deputetja Erisa Xhixho dhe Sekretari Organizativ i Partisë së Lirisë, Endrit Braimllari kanë qenë në shkollën “Ibrahim Basha” në Kamëz ku kanë marrë pjesë në një protestë të organizuar nga prindërit e nxënësve të cilët prej kohësh janë shpërndarë në shkolla të tjera, pasi shkolla e tyre i është nënshtruar rikonstruksionit.

Xhixho kërkoi llogari për tenderimin e kësaj shkolle, pasi punimet kishin nisur prej muajit mars dhe ende nuk kishte asnjë lloj përgjigjie se kur do të përfundonin apo në çfarë faze ishin, duke lënë të gjithë qytetarët pa asnjë përgjigjie.

“Edhe pse të larguar nga shkolla e tyre drejt shkollave të tjera të cilat janë një orë larg, përsëri nuk ka asnjë gjurmë të punimeve në këtë shkollë, nga marsi gjer më sot. Gjithashtu sot personalisht do dorëzoj në bashkinë e Kamzës këtë letër me këtë peticion të banorëve që nuk janë marrë në konsideratë. Në këtë letër janë të renditura disa pyetje lidhur me punimet e kësaj shkolle”-tha Xhixho.

Ndërkohë njëri prej qytetarëve u shpreh i indinjuar për shkak se 7 nipat e tij, ishin shpërndarë në shkolla të ndryshme të cilat ishin shumë larg banesave të tyre.

“Jam shumë i indinjuar për këta të bashkisë tonë këtu. Nëse bashkia nuk do kishte mundësi të investonte këtu, unë kam 7 nipa, të shpërndarë në disa shkolla. U detyrua një djalë i imi më tha nuk rri këtu sepse tha nuk kam ku t’i çoj në shkollë. Mua më dhemb zemra kur shoh që largohen.

Kjo shkollë që edukonte 1300 nxënës është vetëm gërmadhë. Pse e prishni mor vëlla, kur nuk keni fonde për ta rregulluar. I kërkoj kryebashkiakut dhe kryeministrit të marrë masa për këtë komunitet se do dalim aty të bllokojm rrugën”– u shpreh njëri prej qytetarëve.

“Sapo e pashë tani sërish, shkolla asnjë plasaritje nuk ka. Tani nuk e di se çfarë duan të bëjnë me të, apo duan t’ja japin ndonjë privati”- u shpreh një tjetër qytetar.