Ish-deputeti i Partisë Demokratike, Ervin Salianji, ka reaguar pas vendimit të Kryetares së Kuvendit për të shpallur vakancën e krijuar nga burgosja e tij, e cila çoi në heqjen e mandatit të tij si deputet. Në një postim në rrjetet sociale, Salianji e cilëson këtë një vendim politik të orkestruar nga Kryeministri Edi Rama.
“Edhe nga burgu politik do të vazhdoj të jem tmerri i atyre që mendojnë se me izolimin tim do të më mbyllin gojën,” shkroi Salianji, duke theksuar se “asgjë nuk më ndal! Beteja politike vazhdon.”
Ai shpreh krenarinë për punën e tij në shërbim të qytetarëve dhe e quan heqjen e mandatit një përpjekje të socialistëve për ta larguar nga radhët e opozitës në Parlament.
“Sot, me vendimin politik të Edi Ramës, socialistët vendosin ta fshijnë emrin tim nga radhët e opozitës në Parlament, duke hequr mandatin e dhënë nga qytetarët e Korçës! Jam krenar që në çdo ditë të ekzistencës time politike i kam shërbyer vetëm interesit të qytetarëve!”
