Pothuajse 48 orë pasi Argjentina u kurorëzua për herë të tre kampione e Kupës së Botës në Katar, festimet vazhdojnë.
Leo Messi ka publikuar disa postime në llogarinë e tij në Instagram, por i fundit prej tyre ishte jashtëzakonisht i veçantë.
Ylli argjentinas ka shkruar një letër emocionuese duke kujtuar rrugën drejt fitores në Kupën e Botës dhe ka përmendur edhe ata që nuk kanë mundur të jenë aty. Shkrimit ia ka bashkangjitur edhe një video prekëse pas fitores së Kupës së Botës.
Këto janë fjalët e Leo Messit:
“Nga Grandoli deri në Kupën e Botës në Katar, kaluan pothuajse 30 vjet. Kanë qenë gati tri dekada gjatë së cilave topi më dha shumë gëzim dhe gjithashtu pak trishtim. Gjithmonë e kam pasur ëndërr për të qenë kampion bote dhe nuk doja të ndalja së provuari edhe duke e ditur se kjo mund të mos ndodhte kurrë”.
“Kjo Kupë që fituam është edhe për të gjithë ata që nuk e arritën në Botërorët e mëparshëm që luajtëm, si në vitin 2014 në Brazil, ku të gjithë e merituan, sepse luftuan deri në finale, punuan shumë dhe e donin aq shumë, siç bëra unë… Dhe e meritonim edhe atë finale të mallkuar”.
“Është gjithashtu Kupa e Diegos, që na inkurajoi nga parajsa. Dhe e gjithë atyre që e kanë mbështetur gjithmonë Kombëtaren, pa parë aq shumë rezultatin, por dëshirën tonë, edhe kur gjërat nuk shkonin ashtu siç donim”.
