Këngëtarja Sheila Haxhiraj merr pjesë për herë të parë në Festivalin e Këngës në RTSH me këngën e saj “Zemra e tokës”, një përzierje mes folklorit shqiptar dhe rrymës deep-house.

Në një intervistë për emisionin “Në Radio”, Sheila shpjegoi emocionet e këtij debutimi:

“Është një festival ku marrin pjesë shumë artistë dhe zgjedhja është shumë e vështirë. Është e rëndësishme të përfaqësosh veten dhe materialin tënd me dinjitet përpara një publiku të gjerë.”

Kënga, e cila është e shkruar dhe kompozuar nga vetë ajo, pasqyron një rrugëtim shpirtëror dhe rikthimin në vetvete pas momenteve të vështira:

“E kam shkruar këtë këngë në një vit të vështirë që kam kaluar. Dua të jem zëri për ata që ndodhen në momente të errëta dhe nuk e kanë tejkaluar fazën e tyre. ‘Zemra e tokës’ jemi të gjithë ne.”

Sheila theksoi se zgjedhja e zhanrit deep-house është një mënyrë për të eksperimentuar dhe për të sjellë diçka të re në skenën e festivaleve shqiptare:

“Është një kombinim i guximshëm i folklorit dhe deep-house. Ka melankoli dhe gëzim brenda. Është një rrugëtim shpirtëror dhe një fitore e rikthimit në vetvete.”

Ky debutim shënon rikthimin e këngëtares në skenë pas një mungese të gjatë dhe pritet të përqafohet fuqishëm nga publiku.