Organizata policore europiane Europol ka njoftuar se, në bashkëpunim me autoritetet spanjolle, ka shkatërruar një rrjet të madh të trafikut të drogës, duke sekuestruar 6 ton kokainë dhe 6 milionë euro. Hetimi, i nisur në qershor të vitit 2022, përfshiu shtetet e Bullgarisë, Kolumbisë, Kosta Rikës dhe Panamasë, dhe zbardhi një rrjet të sofistikuar të trafikut të drogës që kishte si destinacion Evropën.

Sipas Europol, anëtarët e këtij rrjeti ishin shtetas nga Shqipëria, Bullgaria, Kolumbia dhe Spanja, dhe ata kishin organizuar transportin e sasive të mëdha kokainë nga Kolumbia në Evropë. Anëtarët shqiptarë, të cilët vepronin nga Dubai, kishin marrë rolin e investitorëve, duke siguruar financat për dërgesat. Shtetasit kolumbianë ishin përgjegjës për menaxhimin e dërgesave, ndërsa bullgarët dhe spanjollët mbikëqyrnin shpërndarjen e kokainës në Evropë.

Për të realizuar trafikimin, anëtarët e rrjetit përdornin kontejnerë për të fshehur kokainën dhe e dërgonin atë fshehurazi në portet evropiane, me ndihmën e punëtorëve të korruptuar. Gjatë hetimeve, është zbuluar se rrjeti mund të transportonte deri në një ton kokainë çdo javë, dhe pastronte të ardhurat nga krimet.

Në tetor 2024, autoritetet kapën 4.1 ton kokainë në Panama, me destinacion Spanjën, lidhur me këtë rrjet. Po ashtu, që nga fillimi i hetimeve janë sekuestruar 2 ton kokainë në Spanjë. Aksioni, i realizuar në tre faza nga dhjetori 2024 deri në janar 2025, çoi në 22 arrestime në Spanjë dhe 27 bastisje shtëpish.

Përveç kokainës, janë sekuestruar gjithashtu 6.5 milionë euro cash, 35 automjete, përfshirë 8 makina luksoze (vlerësuar rreth 2.5 milionë euro), orë dhe stoli luksoze (vlerësuar rreth 1.5 milionë euro), 48 armë dhe 53 llogari bankare të ngrira në banka.

Europol theksoi se rritja e dërgesave të kokainës nga Amerika e Jugut në Evropë dhe infiltrimi i rrjeteve kriminale në bizneset legale dhe ilegale në Bashkimin Europian ka çuar në krijimin e një Task Force Operacionale për të luftuar këtë fenomen.

Koordinimi dhe shkëmbimi i informacionit midis autoriteteve kombëtare gjatë hetimit ka mundësuar ndalimin e këtij rrjeti të trafikut të drogës dhe zbulimin e një sasie të konsiderueshme droge dhe pasurish të paligjshme.