Pas 12 vitesh përpjekjesh të pafundme, Xhetan Ndregjoni ka arritur t’i sjellë nga Siria mbesën e tij, Eva, e cila iu mor nga bashkëshorti përmes mashtrimit dhe u dërgua në zonat e kontrolluara nga Shteti Islamik.

Në një intervistë për Top Channel, Ndregjoni tregoi momentet prekëse kur pa për herë të parë mbesën pas kaq shumë vitesh:
“Mu hodh në qafë e vetëm thoshte: daja, daja… nisi të qante. Ishte e frikësuar, pasi ishte rrethuar me njerëz të panjohur, të cilët e sollën nga një rrugë e gjatë prej Sirisë në kufirin me Turqinë. Nuk munda ta besoja se ajo mbërriti. Hera e fundit kur e kisha parë ishte 8 vjeçe. Ajo sot është 20 vjeçe,” tregoi ai.

Xhetani falënderoi autoritetet shqiptare dhe turke për ndihmën e tyre në rikthimin e Evës dhe shprehu mirënjohjen për të gjithë ata që kontribuan për këtë moment:
“Mirënjohje të pafundme për çdo njeri që besoi tek Eva dhe për çdo njeri që ndihmoi që Eva të jetë sot pranë familjes! Faleminderit! Faleminderit!”

Ai shtoi se tani dëshiron që Eva, njësoj si të gjithë fëmijët e tij, të rritet e rrethuar me dashuri, bashkë me të vëllain Endrin. Ky rikthim shënon përfundimin e një kapitulli të gjatë dhe dramatik për familjen Ndregjoni.