Prokuroria Themelore në Mitrovicë ka kërkuar caktimin e masës së paraburgimit ndaj 10 prej 34 kryesuesve të Qendrave Komunale të Numërimit (QKN), të ndaluar për dyshimin e falsifikimit të rezultateve gjatë zgjedhjeve të 28 dhjetorit 2025. Lajmin e konfirmoi për Telegrafin zëdhënësi i prokurorisë, Valon Preteni, duke shtuar se 34 persona janë ndaluar për 48 orë nën dyshimin për veprën penale “falsifikim i rezultateve të votimit”.

Sipas Prokurorisë, janë intervistuar 43 kryesues të QKN-ve në komunat Mitrovicë Jug, Mitrovicë Veri, Leposaviq, Zubin Potok dhe Zveçan, për shkak të dyshimeve për manipulim të rezultateve zgjedhore.

Valon Preteni ka theksuar se:

“Sipas Kodit Penal të Republikës së Kosovës, manipulimi i qëllimshëm i votës apo i rezultatit zgjedhor përbën vepër penale dhe dënohet me burgim deri në pesë vjet.”

Gjykata pritet të vendosë për masën e sigurisë ndaj të ndaluarve në seancat e ardhshme.