Në një postim të ndjerë në rrjetet sociale, familja e publicistit dhe ish-drejtuesit të ALUIZNI-t, Artan Lame, ka shprehur mirënjohje të thellë për mbështetjen dhe dashurinë që kanë marrë gjatë ditëve të dhimbshme pas ndarjes së tij nga jeta.

Mes qindra mesazheve dhe përqafimeve, familja ka veçuar mesazhin e ish-Ambasadores së SHBA-së në Shqipëri, Yuri Kim, e cila ka ndarë fjalë prekëse për Lamen:

“Ai ishte një njeri vërtet unik: i pasionuar pas artefakteve të periudhës komuniste dhe puna e tij lidhej në shumë mënyra me zgjidhjen e problemeve historike, por më shumë se shumica e njerëzve, ai ndihmoi në ndërtimin e së ardhmes së Shqipërisë. U prehtë në paqe.”

Në postimin e saj, familja Lame shkruan:

“Këto fjalë na prekin thellë. Sepse po, Tani ishte i tillë: e njihte të shkuarën me rrënjë, por e deshi të ardhmen me të gjithë shpirtin. Faleminderit nga zemra për secilin prej jush që ka ndarë dhimbjen tonë dhe ka vënë një homazh shpirtëror mbi kujtimin e tij. Dashuria dhe respekti juaj e bëjnë këtë humbje më të lehtë për ta përballuar.”

Figura e Artan Lames ka lënë një gjurmë të thellë në jetën publike shqiptare – si publicist, intelektual dhe një njeri që e përqafoi historinë për të ndërtuar të ardhmen.