Një histori e pabesueshme mashtrimi ka tronditur Britaninë. Jack Watkin, 26 vjeç, i njohur si “fëmija i pasur i Instagramit”, është dënuar me gjashtë vite burg pasi mashtronte miq, të afërm dhe biznesmenë me një skemë mashtrimi që arrinte në 230 mijë euro.

Watkin, që në rrjetet sociale paraqitej si milioner dhe thoshte se familja e tij ishte “si Kardashianët e Britanisë”, u tregonte viktimave se kishte një biznes fitimprurës me çantat luksoze Hermès. Ai i bënte njerëzit të investonin në “blerje dhe rishitje çantash” që në fakt nuk ekzistonin.

Jetë luksoze me paratë e mashtrimit

Sipas Gjykatës së Kurorës në Chester, gjatë dy viteve e gjysmë, Watkin shpenzoi mbi 1.38 milionë euro për luks dhe jetesë ekstravagante. Ai banonte në hotele me pesë yje në Londër, paguante 3,450 euro nata, dhe kishte një faturë prej 156,000 euro për vetëm gjashtë muaj.
Ai udhëtonte me Rolls Royce me shofer, shpenzonte 78,000 euro në Harrods dhe e përdorte këtë stil jete për të joshur viktima të reja.

Në mesin e viktimave ishin edhe persona të afërt:
• Hannah Jakes, mashtruar për 113,000 euro
• Christine Colbert, pronare butiku, humbi 50,000 euro dhe dy çanta Hermès me vlerë totale 33,000 euro
• Babai i tij, mashtruar për 16,000 euro
• James Irlam, biznesmen, mashtruar për 28,500 euro
• Andor Farkas, kamarier në Harrods, humbi 16,000 euro
• Nahim Akhtar, mashtruar për 950 euro për një palë këpucë që nuk i mori kurrë

Arrestimi spektakolar

Ai u arrestua në një pritë policore, pasi një prej viktimave e joshur me premtimin për një orë Rolex 35,000 euro, e ftoi në një pub. Policia e priti në parking dhe e arrestoi në vend. Gjatë kontrollit, u gjet një depo në Knightsbridge, e mbushur me mallra dhe veshje firmato.

Nga “Rich Kids of Instagram” në burg

Watkin u bë i famshëm në moshën 17-vjeçare në dokumentarin e Channel 4 “Rich Kids of Instagram”, ku fliste për makinat, orët dhe jetën e tij luksoze. Por pas divorcit të prindërve në 2019, ai humbi mbështetjen financiare dhe nisi mashtrimet.

Pornografi e ndaluar dhe dënime shtesë

Gjatë hetimeve, policia zbuloi në telefonin e tij imazhe të abuzimit me fëmijë dhe materiale pornografike të ndaluara. Për këtë, ai mori 18 muaj burg shtesë, duke e çuar dënimin total në 6 vjet.

Gjyqtari: “Krijuat një iluzion për të mashtruar”

Në seancë, gjykatësi Simon Berkson i tha:

“Ju krijuat një identitet të rremë si person i pasur dhe i lidhur mirë, për të mashtruar viktimat. Qëllimi juaj ishte vetëm të pasuroheshit vetë dhe të shpenzonit për luks.”

Ky rast ka ndezur debatin në Britani për rrezikun e mashtrimeve përmes rrjeteve sociale, ku imazhi i jetës perfekte shpesh maskon realitetin e krimit dhe manipulimit.