Një incident i rëndë ka tronditur komunitetin arsimor në lagjen Wilhelmstadt të Berlin-Spandau, ku një 11-vjeçar u plagos rëndë me thikë brenda ambienteve të shkollës fillore ku mësonte.

Ngjarja ndodhi të enjten paradite rreth orës 11:30, dhe sipas autoriteteve gjermane, viktima iu nënshtrua menjëherë një operacioni urgjent në spital. Gjendja e tij aktualisht raportohet e qëndrueshme.

Policia e Berlinit ka identifikuar një 13-vjeçar, shok klase i viktimës, si autor të dyshuar të sulmit. Fëmija ndodhet në kërkim, dhe për kapjen e tij janë angazhuar helikopterë dhe njësi speciale me qen nuhatës.

Motivi i ngjarjes mbetet ende i paqartë. Mësohet se të dy fëmijët ndodheshin në të njëjtën klasë kur ndodhi sulmi i papritur.

Ngjarja ka lënë gjurmë të thella te nxënësit e tjerë. Rreth 20 fëmijë u trajtuan në vendngjarje për gjendje shoku, nga ekipet e emergjencës dhe psikologë të specializuar.

Policia po vijon hetimet ndërsa komuniteti lokal është i tronditur nga një akt dhune i pazakontë për moshat kaq të vogla.