Një ngjarje e rëndë është regjistruar pasditen e kësaj të diele në fshatin Shqitas të Maliqit, ku një fermeri i ka shpërthyer granata ndërsa ishte duke punuar tokën dhe për pasojë është plagosur.

I plagosuri është 39-vjeçari Hergert Spahiu. Ai ishte duke punuar tokën me frezë, teksa ra në kontakt me mjetin shpërthyes.

Sipas Policisë, ai ka marrë dëmtime në dorë, është transportuar drejt spitalit dhe ndodhet nën kujdesin e mjekëve në spitalin e Korçës.

NJOFTIMI NGA POLICIA

Maliq/Informacion paraprak

Më datë 16.05.2021, rreth orës 16:10, në Spitalin e Korçës, ka shkuar për ndihmë mjekësore shtetasi H. S., rreth 39 vjeç, banues në fshatin Shqitas, Maliq, i cili duke punuar tokën e tij me një mjet bujqësor tip frezë, ka rënë në kontakt me një mjet shpërthyes (dyshohet granatë e vjetër) ku për pasojë ky shtetas ka marrë dëmtime në dorë dhe ndodhet nën kujdesin e mjekëve.

Grupi hetimor po punon për të sqaruar rrethanat e ngjarjes.