Ish-reperi Fero ka ndarë me ndjekësit e tij në Instagram një shqetësim të thellë lidhur me situatën e tij personale. Ai ka bërë të ditur se po përballet me një problem të rëndësishëm, pasi nuk i lejohet të takojë vajzën e tij. Sipas tij, ky vendim është një padrejtësi që po i bëhet nga gjykatësit në Gjilan dhe e ka prekur thellë emocionalisht.

Në postimin e tij, reperi shprehu: “I bëj thirrje të gjitha mediave sepse jam në shqetësim të madh. Është duke m’u bërë një padrejtësi shumë e madhe prej organeve të ligjit, më saktësisht Gjykatës së Gjilanit. Jam i thyer emocionalisht dhe jam në depresion të rëndë.” Kjo situatë ka shkaktuar shqetësim te fansat e tij, të cilët kanë shprehur solidaritet dhe mbështetje për artistin.

Fero gjithashtu njoftoi se do të bashkëpunojë me mediat për çdo zhvillim të ri që lidhet me të drejtat e tij, duke theksuar mirënjohjen për përkrahjen e marrë. Ai shkroi: “Për çdo ndodhi të radhës do të bashkëpunojmë për të drejtat e mia. Faleminderit të gjithëve për përkrahjen.” Situata mbetet e paqartë, ndërsa pritet që mediat të sjellin më shumë informacion mbi rrethanat e çështjes.