Reperi i njohur Fero ka publikuar projektin e tij më të ri muzikor, që shënon edhe rikthimin në skenë, pas një periudhe pauze dhe polemikash të shumta në jetën personale. Siç ishte paralajmëruar, kënga e tij e re është një “diss” i drejtpërdrejtë ndaj ish-bashkëshortes, Arbenita Ismajli, duke i drejtuar asaj fjalë të ashpra dhe akuza të forta.

Në tekstin e këngës, Fero shfryn mllefin për zhvillimet në jetën familjare dhe humbjen e kujdestarisë së vajzës së tyre. Ai nuk ndalet vetëm te Arbenita, por përmend edhe avokaten e saj, znj. Blinera Osmani, duke e lidhur me politikën dhe duke i referuar si “motra e Presidentes”.

“Presidente, le ta din Kryeministri, motra jote është arsyeja që mu çika m’iki,” dëgjohet të thotë Fero në një nga vargjet më të diskutueshme të këngës, që ka ndezur reagime të shumta në rrjet.

Ky publikim vjen në një kohë kur raportet mes dy ish-partnerëve janë të tensionuara, sidomos pas betejës ligjore për vajzën e tyre. Deri më tani, as Arbenita dhe as avokatja Blinera Osmani nuk kanë reaguar publikisht ndaj këngës, por nuk përjashtohet mundësia që kjo këngë të sjellë përplasje të reja në media dhe rrjetet sociale.

Rikthimi i Feros me një tematikë kaq personale dhe provokuese duket se është një strategji e vetëdijshme për të tërhequr vëmendje, por gjithashtu rihap debatet për kufirin mes artit, jetës private dhe etikës në publik.