41-vjeçari Altin Arapaj u vra me një plumb në fytyrë ndërsa ndodhej në një vresht në Rafina të Greqisë. Pas 18 orësh kërkimesh, trupi i tij u gjet i pajetë, ndërsa detaje të reja zbardhin momentet tragjike para vrasjes.

Pak çaste para vdekjes, Arapaj i telefonoi gruan duke i thënë emrin e autorit që e qëlloi, sipas dëshmisë së kushëririt të tij:
“Filani më goditi në kokë me armë dhe eja të më gjesh,” tregoi ai.

Mediat greke identifikuan autorin e dyshuar si Mikel Selimaj, 46 vjeç nga Vlora, me precedentë penalë për drogë. Sipas kushëririt të viktimës, dy personat njiheshin mirë dhe ishin ndarë kohët e fundit, pa pasur përplasje të dukshme:
“Autori i krimit ishte mik me kushëririn tim, ne të gjithë e njihnim. Nuk e dimë pse ndodhi kjo, nuk mund ta imagjinonim,” tha ai.

Policia greke po punon intensivisht për arrestimin e autorit, ndërsa familja dhe komuniteti mbeten të tronditur nga ngjarja tragjike.