Në kuadër të operacionit të koduar “Operacionalja”, forcat e policisë kanë finalizuar me sukses kapjen e shtetasit Izmir Dunga, i shpallur në kërkim ndërkombëtar nga Interpol Roma, Itali.

Shtetasi Dunga ishte i kërkuar për ekzekutimin e urdhrit për masën e sigurisë “Arrest në burg”, të dhënë nga Gjykata e Milanos, për veprat penale “Trafikim i lëndëve narkotike” dhe “Pjesëmarrje në organizatë kriminale”, sipas Kodit Penal të Italisë.

“Operacioni u realizua në qytetin e Shkodrës nga shërbimet e Drejtorisë së Forcës së Posaçme Operacionale në Departamentin e Policisë Kriminale, në bashkëpunim me shërbimet operacionale të DVP Shkodër. U bë i mundur lokalizimi, identifikimi dhe arrestimi i shtetasit I. D., 35 vjeç, lindur dhe banues në Shkodër”, njofton policia.

Ky veprim konfirmon koordinimin efektiv të autoriteteve shqiptare me strukturat ndërkombëtare për kapjen e personave të shpallur në kërkim dhe parandalimin e veprimtarive kriminale transnacionale.