Operativët e Komisariatit të Policisë Nr. 4 kanë finalizuar me sukses operacionin policor të koduar “Midnight”, në kuadër të një aksioni për goditjen e paligjshmërisë në fushën e armëmbajtjes pa leje dhe shpërndarjes së drogave të forta. Gjatë operacionit janë sekuestruar një armë zjarri pistoletë, municion luftarak, dhe një sasi lënde narkotike e dyshuar kokainë, e ndarë në doza të gatshme për shitje.

Në kuadër të këtij operacioni, u arrestuan në flagrancë dy shtetas, R. Z., 37 vjeç, dhe babai i tij, B. Z., 65 vjeç, banues në Tiranë. R. Z. u arrestua për veprat penale “Armëmbajtja pa leje” dhe “Prodhimi dhe shitja e narkotikëve”, ndërsa B. Z. u arrestua për veprën penale “Veprime që pengojnë zbulimin e së vërtetës”.

Sipas informacioneve nga Policia, gjatë një kontrolli në rrugën “Niko Avramo” në Tiranë, shërbimet e Policisë kanë ndaluar automjetin që drejtohej nga R. Z., ku gjetën dhe sekuestruan një sasi lënde narkotike të dyshuar kokainë. Pas kësaj, u realizua një kontroll edhe në banesën e tij, ku u gjet dhe u sekuestrua një armë zjarri pistoletë, municion luftarak dhe një sasi e dyshuar e narkotikëve, e ndarë në doza, gati për shitje, me peshë totale rreth 36 gramë.

Ndërkohë, babai i 37-vjeçarit, B. Z., ka tentuar të fshehë provat pasi ka parë shërbimet e Policisë, duke hedhur lëndën narkotike në lavaman dhe duke tentuar të hedhë armën e zjarrit nga ballkoni i banesës.

Materialet e çështjes janë kaluar në Prokurorinë për veprime të mëtejshme procedurale.