Edhe pse kanë kaluar vetëm 27 ditë nga nisja e “Big Brother VIP Albania 5” dhe finalja e madhe është ende larg, për gazetarin Elton Tozaj gara duket se ka tashmë një fitues të padiskutueshëm.

Mes debateve të forta, dinamikave të shumta dhe lojës që po zhvillohet çdo ditë brenda shtëpisë, Tozaj ka veçuar një emër të vetëm, duke deklaruar hapur se fitorja, sipas tij, është e sigurt për Stenaldo Mëhillin.

Gjatë një interviste të fundit, gazetari nuk la vend për dilema, duke e vlerësuar maksimalisht banorin që surprizoi publikun që në hyrje, për shkak të historisë së tij të veçantë dhe faktit se është i verbër.

“Fituesi dihet që është Stenaldo, patjetër. Stenaldo është super personazh. Është një njeri që studion çdo lloj gjëje dhe ta mendosh që është i verbër,” u shpreh Tozaj.

Ai theksoi se përtej karakterit dhe qasjes së tij në lojë, Stenaldo përfaqëson një rast unik jo vetëm për edicionin shqiptar, por edhe në nivel ndërkombëtar.

“Stenaldo është i vetmi njeri i verbër konkurrent, i vetmi i verbër që ka hyrë në çdo Big Brother në botë,” shtoi gazetari.

Deklarata e fortë e Tozajt pritet të ndezë debate mes ndjekësve të reality show-t, në një kohë kur loja është ende në fazat e para dhe dinamika mes banorëve mbetet e paparashikueshme.