Pasi ka vendosur në thundrën dhe komandën e saj shumicën e ministrive, zv/kryeministrja Belinda Balluku duket se po shtrin “duart” (tentakulat) edhe tek Administrata Publike. Ministrat e rinj, si Pirro Vengu, Ervin Hoxha dhe Petrit Malaj, thuhet se janë “ushtarë” të Belinda Ballukut. Kjo e fundit tani dyshohet se po paracakton edhe fituesit e Statusit të Nënpunësit Civil. Aleks Marku, shef i kabinetit të Pirro Vengut, thuhet se do të emërohet si Sekretar i Përgjithshëm në Ministrinë e Mbrojtjes. Po ashtu, Ermal Nufi, shef i kabinetit të Ballukut në cilësinë e zv/kryeministres, pritet të graduahet dhe të emërohet në një post të rëndësishëm.

Këto zhvillime sugjerojnë një kapje të mundshme të administratës, duke e bërë situatën më të komplikuar. Në këtë kontekst, Departamenti i Administratës Publike ka shpallur rezultatet e verifikimit paraprak për pranimin e drejtpërdrejtë në trupën e Nëpunësve Civilë të Nivelit të Lartë Drejtues (TND). Në përputhje me Kreun IV dhe Kreun V të Vendimit nr. 118, datë 05.03.2014 të Këshillit të Ministrave, i ndryshuar, njoftohet se kandidatët e kualifikuar për të vazhduar në fazën e dytë të konkurrimit janë:

– Aldeina Laska
– Aleks Marku
– Anila Shehu
– Ermal Nufi
– Evis Mamaj
– Mirela Duka
– Rudina Zoto
– Silva Breshani

Testimi me shkrim për këta kandidatë do të zhvillohet më 30.09.2024. Për orën dhe vendin e testimit me shkrim do të njoftoheni përmes komunikimit elektronik. Pas zhvillimit të testimit me shkrim, kandidatët do të njoftohen nëpërmjet adresës së email-it lidhur me datën dhe orën e zhvillimit të intervistës së strukturuar me gojë. Këto ndryshime dhe emërime vazhdojnë të ngjallin dyshime dhe diskutime për ndikimin e Ballukut në administratën publike.