Ministri i Mbrojtjes, Niko Peleshi në një deklaratë për mediat, ka treguar situatën aktuale të zjarreve në gadishullin e Karaburunit dhe rrethinat e Vlorës.
Rreth 500 efektivë të Forcave të Armatosura, 50 mjete, 3 helikopterë, zjarrfikëse e autoambulanca janë angazhuar prej orëve të para të mëngjesit të sotëm në operacionin për shuarjen e flakëve në Gadishullin e Karaburunit, që mbetet zona më kritike për momentin në vend.
“Kanë një muaj që vatrat kanë qenë aktive, duke nisur me Malin e Tomorit, ku situata ka qenë problematike. Ndërsa në Vlorë, kemi neutralizuar flakët në Pashaliman. Drejtimi i erërave ndryshon dhe ne po marrim masa, kanë ardhur në Vlorë 500 trupa të ushtrisë. Kemi shumë mjete për të përballuar situatën. Në Pashaliman ka pasur një riaktivizim. Para 30 minuash në Himarë kishte një tjetër zjarri, kështu është situata e zjarreve.
Duke parë që po ndodh në Rajon, për fat të mirë s’jemi pasur banesa të shkatërruara, persona të lënduar, apo rrezik. Një flotë ushtarake si Turqia, sot ka dhjetëra banesa të djegura, viktima. S’është e lehtë të thuhet se përse ende nuk janë neutralizuar zjarret. Kryeministri ka pasur kontakte me palën italiane, turke, greke, edhe me Kroacinë për të parë mundësinë ndihmës prej tyre. Ata do të na suportojnë. Zjarret lindin nga momentet në moment.
Sot kemi pasur ndihmë të helikopterit për dërguarjen e trupave. Ne jemi shumë afër vatrave, operacioni po bëhet nga toka dhe ajri. Janë djegur shkurre dhe jo pyje, ky është dhe rreziku dhe këtë po përpiqemi të shmangim. Tre helikopterë do të punojnë gatë ditës për të neutralizuar flakët, pasi rreziku vjen gjatë orëve të pasdites”, tha Peleshi.
Ministria e Mbrojtjes informon se flakët kanë vijuar të jenë aktive përgjatë natës, duke u kthyer në rrezik për banorët e fshatit Dukat.
“Aksioni po vijon prej orësh nga toka dhe nga ajri për të vënën nën kontroll flakët, në mënyrë që ato të mos përparojnë drejt Parkut të Llogarasë”, thekson ministria.
Një tjetër vatër aktive është në fshatin Cukal, njësia administrative Shllak, bashkia Vau Dejës, ku ka rënë zjarr në një sipërfaqe me shkurre dhe pemë të ndryshme.
