Vatra e zjarrit pranë Parkut Natyror të Gërmenjës në Korçë vijon të jetë aktive, ndërsa era e fortë ka favorizuar përhapjen e flakëve drejt territorit grek. Situata mbetet e vështirë dhe forcat zjarrfikëse janë të angazhuara në terren për të frenuar përhapjen e zjarrit.

Rreth 40 efektivë dhe 9 mjete zjarrfikëse po punojnë për mbajtjen nën kontroll të perimetrit të zjarrit, ndërkohë që bashkia Kolonjë ka vënë në dispozicion tre mjete për hapjen e rrugëve pyjore, me qëllim afrimin sa më pranë të mjeteve zjarrfikëse në zonën e prekur.

Terreni ku ka rënë zjarri është rreth dy orë larg dhe tepër i vështirë për t’u arritur, ndërsa ekziston rreziku i pranishëm nga municione të pashpërthyera, gjë që e bën operacionin edhe më të ndërlikuar. Për këtë arsye, ndërhyrja në terren kryhet me kujdes të shtuar dhe sipas protokolleve të sigurisë.

Autoritetet po monitorojnë situatën në mënyrë të vazhdueshme, ndërsa prioritet mbetet mbrojtja e Parkut Natyror dhe parandalimi i kalimit të flakëve në kufirin grek.