Fundjava e parë e muajit gusht ka sjellë rritje të ndjeshme të lëvizjes së qytetarëve dhe automjeteve në pikën kufitare të Kakavijes, në të dyja drejtimet e kufirit shqiptaro-grek.

Sipas të dhënave zyrtare të Policisë Kufitare, gjatë 24 orëve të fundit kanë hyrë në Shqipëri rreth 6 mijë persona dhe 1 700 automjete, kryesisht emigrantë që jetojnë në Greqi dhe kthehen për të kaluar pushimet pranë familjeve të tyre.
Në të njëjtën kohë, 3 500 persona dhe 1 300 automjete kanë udhëtuar drejt Greqisë, shumica prej tyre shtetas shqiptarë që zgjedhin të kalojnë pushimet verore në vendin fqinj.

Masa për përballimin e fluksit

Për shkak të fluksit të lartë, autoritetet shqiptare kanë hapur 4 sportele për hyrje dhe 3 për dalje, ndërsa pala greke ka shtuar gjithashtu sportelet për kontrollin e dokumenteve.

Megjithatë, edhe pse janë marrë masa shtesë, e shtuna është shoqëruar me radhë të gjata dhe vonesa për shkak të fluksit të shtuar të udhëtarëve dhe mjeteve.