Trajneri i Kombëtares Shqiptare, Silvinjo, ka kristalizuar formacionin që do të zbresë në fushë të shtunën në ndeshjen e parë të Ligës së Kombeve kundër Ukrainës. Pas analizës së ndeshjeve në finalet e “Euro 2024” dhe përgatitjeve intensive në Tiranë, strategu brazilian duket i vendosur për skemën e tij taktike.
Në portë do të jetë Thomas Strakosha, ndërsa mbrojtja me katër përbëhet nga Elseid Hysaj dhe Adrian Mitaj në krahë, me Marash Kumbullën dhe Ardian Ismajlin në qendër. Mungesat e rëndësishme të Berat Gjimshitit dhe Albian Ajetit për shkak të dëmtimeve, kanë detyruar Silvinjon të ndërtojë këtë linjë mbrojtëse.
Në mesfushë, Silvinjo ka ruajtur të njëjtën strukturë nga ndeshjet e fundit, duke kërkuar ekuilibër në lojë. Qendrorët Keidi Bare dhe Ylber Ramadani do të mbrojnë mbrojtjen, ndërsa Kristjan Asllani do të ketë përgjegjësinë e organizimit të lojës. Përsa i përket krahëve, Nedim Bajrami do të operojë në të majtë dhe Jasir Asani në të djathtë, me të dy që do të mbështesin sulmuesin kryesor, Rey Manaj.
Kjo përbërje synon një fillim të fortë të Kombëtares në edicionin e ri të Ligës së Kombeve, ku synimi është fitorja kundër një kundërshtari të fortë si Ukraina.
