Një konflikt i vjetër duket se është bërë shkak për një ngjarje të rëndë në Elbasan, ku një 25-vjeçar humbi jetën në përpjekje për të vendosur eksploziv në një automjet. Policia njoftoi se ngjarja ndodhi në lagjen “Shënkoll” dhe viktima është identifikuar si Kristi Balukja, banues në Elbasan.

Sipas burimeve zyrtare, shpërthimi ndodhi gjatë momentit të vendosjes së eksplozivit në një makinë tip “Volkswagen” në pronësi të Renato Çepës. Shpërthimi i shkaktuar nga lënda eksplozive rezultoi fatal për Balukjan, i cili ndërroi jetë më vonë në spital.

Nga hetimet paraprake rezulton se Balukja ka vepruar për shkak të një konflikti të hershëm, të cilin e konsiderohej për motive të parëndësishme. Një grup i posaçëm hetimor, i përbërë nga strukturat hetimore të Drejtorisë Vendore të Policisë Elbasan, Komisariati i Policisë Elbasan dhe ekspertët e Policisë Kriminale në DPPSH, nën drejtimin e Prokurorisë, po punon për të sqaruar plotësisht rrethanat e kësaj ngjarjeje.