Një ngjarje e rëndë ka tronditur mbrëmjen e sotme fshatin Jabllanicë të Gjakovës, ku tre të mitur kanë humbur jetën si pasojë e shembjes së një shtëpie të pabanuar.

Sipas raportimeve nga mediat kosovare, dy nga viktimat janë identifikuar si 16 dhe 14 vjeç, ndërsa mosha e viktimës së tretë ende nuk është konfirmuar.

Sipas zëdhënësit të policisë, fqinjët kanë arritur të nxjerrin trupat e pajetë nga rrënojat.

“Më datë 1 shkurt 2025, rreth orës 22:50, jemi njoftuar se në fshatin Jabllanicë është rrëzuar pllaka e një shtëpie të pabanuar, duke zënë poshtë tre fëmijë. Në vendngjarje kanë dalë njësitë e nevojshme policore, si dhe ekipet e emergjencës, përfshirë ambulancën dhe zjarrfikësit. Personeli mjekësor ka konstatuar në vendngjarje vdekjen e viktimave. Lidhur me rastin, është njoftuar edhe prokurori i shtetit, në koordinim me të cilin aktualisht janë duke u ndërmarrë veprimet e nevojshme hetimore”, thuhet në njoftimin e policisë.

“Ideali, Rama dhe Vetoni do të mbahen mend përher si nxënës të hareshëm të dashur me shokët dhe shoqet e tyre të klases, si dhe të përkushtuar në mësime! Në këto momente të rënda, mendimet dhe lutjet tona qëndrojnë me familjet, miqtë dhe të gjithë ata që patën fatin ti njihnin”, thuhet në reagimin e shkollës.

Familjet Morina, Rama dhe Mehmetaj shprehën dhimbjen e madhe për këtë ngjarje tragjike në njoftimin mortor, në të cilin. ndër tjerash shkruhet: “Largimi i tyre i parakohshëm ka lënë një boshllëk të madh në zemrat tona”.