Në pasditen e datës 1 dhjetor 2024, Alfred Dedja, 50 vjeç, është ekzekutuar me armë zjarri brenda një lokali në Ndroq, Tiranë. Viktima, i njohur me pseudonimin “Daku”, ishte një klient i lokalit dhe po qëndronte i ulur në një tavolinë kur Julian Gjoshi, autori i dyshuar, e ka qëlluar me dy plumba. Pas ngjarjes, Gjoshi është larguar me një automjet “Benz ML” dhe ka drejtuar drejt Durrësit.

Hetimet tregojnë se Dedja dhe Gjoshi kishin njohje të hershme, dhe disa ditë para ngjarjes dyshimet janë se kanë pasur një konflikt mes tyre. Gjoshi ka hyrë në lokal i pamaskuar dhe ka qëlluar viktimën kur ai ka tentuar ta përqafojë.

Pista kryesore për hetuesit është prishja e pazareve të drogës, pasi Gjoshi është një emër i njohur në krimin e organizuar dhe ka precedentë penalë për armëmbajtje pa leje. Ai është i lidhur ngushtë me Altin Hajrin, pronarin e kompleksit “Golden” në Shijak, i kërkuar për rrëmbimin dhe zhdukjen e Jan Prengës në vitin 2020.

Ekspertët e policisë kanë mbledhur prova dhe dëshmitë e personelit të lokalit dhe kanë sekuestruar kamerat e sigurisë. Vrasja ka ndodhur në një moment kur në lokal ka pasur edhe persona të tjerë, dhe hetimet po vazhdojnë për zbardhjen e rrethanave të plota të ngjarjes.

Gjoshi është identifikuar si autor i dyshuar dhe aktualisht është në kërkim, ndërkohë që janë shoqëruar disa persona, përfshirë edhe familjarë të tij.