Fredi Alizoti, dëshmitari kyç i dosjes “Babale”, që përmes rrëfimit të tij përmbysi çështjen duke e shndërruar në një skandal të fabrikuar, ka pësuar një rrahje brutale nga Behar Bajri dhe anëtarët e grupit të tij. Alizoti kishte pranuar në prokurori se përgjimi që implikonte Agron Xhafajn ishte një mashtrim i përgatitur nga ai dhe Albert Veliu, i njohur si “Babale”. Dëshmia e tij jo vetëm që pastroi figurën e Agron Xhafajt, por u bë prova kryesore për dënimin e deputetit të Partisë Demokratike, Ervin Salianji, si dhe të Albert Veliut dhe gazetarit Jetmir Olldashi.
Ngjarja ndodhi në lagjen “Dobraç” të Shkodrës, më 3 korrik 2020, kur Alizoti kishte shkuar në qytetin verior dhe kishte kërkuar të takonte Behar Bajrin. Bajri, që sapo kishte lënë qelinë e paraburgimit pas një vendimi të gjyqtarit Sokol Shehu, ishte në shtëpi dhe kishte rritur masat e sigurisë për t’u mbrojtur nga një sulm i mundshëm. Alizoti, i cili depërtoi në lagje, u kap nga anëtarët e grupit dhe u dhunua brutalisht deri në atë pikë sa nuk mundi të kontrollonte urinën.
Detajet e dhunës dolën nga biseda të zhvilluara në aplikacionin “Sky” mes Behar Bajrit dhe biznesmenit Pëllumb Gjoka. Sipas bisedave, Bajri nuk e njihte fillimisht Alizotin, por Pëllumbi e informoi se ai ishte dëshmitari që kishte spiunuar vëllain e Agron Xhafajt në çështjen “Babale”. Bajri, i vendosur për të vepruar, e rrahu Alizotin dhe më pas e dorëzoi tek autoritetet.
Dhuna fizike e kryer në grup ishte një specialitet i grupit të Behar Bajrit në Shkodër. Një fakt i tillë del gjatë dy bisedave që Behar Bajri zhvillon me biznesmenin Pëllumb Gjoka, ku mes komunikimeve të zhvilluara në aplikacionin “Sky” të datës 3 korrik 2020, Behari i thotë Pëllumbit:
“…a e njeh këtë se nuk e njoh unë, se më thotë veç kam ardhur me të taku për nji Alizoti… Fred Alizoti, qa ky…? Pyet njëherë…”.
Dhe Pëllumbi ia kthen si më poshtë vijon: “…prit të pyes…”.
Por Behari vijon t’i shkruajë Pëllumbit duke i thënë se nëse ka ndonjë kush ndonjë gjë me këtë ta humbi kundi krejt, nëse e ka aty në “Dobraç”.
“…pyet i her, a ka kush najgja ta hupi krejt. Nëse asht najgja, se e kam këtu kurvën…”-i thotë Behari, Pëllumbit.
Por ky i fundit ia kthen: “…është Fierak, është mashtrues, ai që spiunoi…prit pak, është ai që spiunoi vëllain e Xhafës”.
Behari: “…aaaa po…nëse ka najgja e hupi krejt, nej shok a kujt që i intereson, por pyet njëherë…”.
Pëllumbi: “…Prit se po pyes at shokun tem at qerosin, po pate mundësi mja ban një foto…?”.
Ndërsa Behar Bajri ia kthen Pëllumbit duke i shkruar: “…Po Fred Alizoti, a ka ken në burg…?”
Por në këtë moment Pëllumb Gjoka i dërgon në “Sky” një foto të Fredi Alizotit, kur ka dalë para gjykatës së Tiranës për masën e sigurimit “arrest në burg” në dosjen “Babalja”, duke i shkruar Beharit si më poshtë:
“…asht mashtrues, po përcille…s’ka ça të duhet e mos fol asgja me atë. Është njeri kot komplet, nuk ja vlen për asgja…”.
Behari i thotë: “…i bani komplet pantadhonat shurr ky kurv, e nisi të shurrum…”.
Pëllumbi ia kthen: “…asht legen edhe mund ta fusin kundërshtarët për 500 mijë lek dhe policia…”.
