Fredi Beleri, kandidati i opozitës, fitues i zgjedhjeve lokale në Himarë u la ditën e sotme në masën e sigurisë ‘arrest me burg’ nga Gjykatës së Posaçme kundër Krimit të Organizuar dhe Korrupsionit.

E njëjta masë u dha edhe për bashkëpunëtorin e tij, Pandeli Kokaveshin, i cili është i shtruar në spital për probleme shëndetësore.

Avokatët e kryebashkiakut thanë se do të ankimojnë në Gjykatën e Apelit, vendimin e Gjykatës së Posaçme (GJKKO) që e la në qeli Belerin.
Ata deklaruan se Fredi Beleri ka kërkuar drejtësi nga gjykata dhe se nuk i ka pranuar akuzat që janë ngritur në drejtim të tij. • Gjyqtarja e çështjes ishte Atalanta Zeqiraj.

Beleri u arrestua dy ditë para zgjedhjeve të 14 majit me akuzën për korrupsion zgjedhor.

Tashmë mbetet mister sesi do vijojë procedura, pasi Beleri është zgjedhur si kryetar Bashkie nga himariotët.